INUMANEWS

Impaka hagati y’Umuvugizi wa Kaminuza y’u Rwanda (UR), Ignatius R. Kabagambe, n’umunyamakuru Mutesi Scovia zakomeje gufata indi ntera nyuma y’uko uyu munyamakuru anenze uburyo Kabagambe yasubije umuntu wavuze ko hari abarimu basaba abanyeshuri ruswa ishingiye ku gitsina. Aya makimbirane yatangiriye ku kibazo cyavuzwe ku mbuga nkoranyambaga, aho uwitwa Keza Leila yagaragaje ko hari abarimu bo muri Kaminuza y’u Rwanda, ishami rya Huye, bakoresha amanota nk’uburyo bwo guhatira abanyeshuri kwemera gukora imibonano mpuzabitsina na bo. Umunyamakuru Mutesi Scovia ntiyanyuzwe n'uko Kabagambe yitwaye kuri iki kibazo, amunenga avuga ko nk'umuvugizi wa Kaminuza y'u Rwanda yari akwiye gushyira imbere icyizere cy'abanyeshuri no kugaragaza ko ibirego byatanzwe bigiye gukurikiranwa, aho kwibanda ku kumenya niba uwabitangaje ari umunyeshuri uzwi na Kaminuza. Scovia yumvikanishije ko uburyo ibirego nk'ibi byakiriwe bushobora gutuma abantu batinya kuvuga ihohoterwa bakorewe, cyane cyane iyo baba bashaka kurinda umutekano wabo n'amazina yabo. Mu gusubiza Scovia, Kabagambe yamubwiye ko atigeze akora muri Kaminuza y'u Rwanda cyangwa ngo abe yarayizemo, bityo ko adakwiye kumwigisha uko agomba gusohoza inshingano ze nk'umuvugizi w'iki kigo.

Ubushakashatsi bw’umuryango Transparency International (TI) urwanya ruswa n’akarengane bwasohotse muri Nzeri 2022 bugaragaza ko mu mashuri makuru na kaminuza, ruswa ishingiye ku gitsina yagaragajwe ku kigero cya 42,6% ndetse ni aha kabiri yagaragaye cyane. Mu buhamya bwakusanyijwe, umunyeshuri wigaga muri kaminuza yagize ati “Umunyeshuri twiganaga yari umuhanga cyane kandi abanyeshuri bose bo mu ishuri ryacu bari babizi. Icyadutangaje ni uko yahawe amanota zeru ku ijana mu masuzuma no mu bizamini nyamara twese twari tuzi ko yari yarabikoze byose.” Uyu munyeshuri yavuze ko mugenzi we akimara kubona iki kibazo, yahamagaye umwarimu kuri telefone amusaba gusobanurirwa iby’amanota ye. Umwarimu yamuhaye gahunda yo guhura, maze bahuye amusaba ko baryamana.