Umunyamakuru w’imyidagaduro n’imikino w’Umunyarwanda, Issiaka Mulemba, yarangije amahugurwa n’amasomo asabwa kugira ngo yinjire mu Ngabo zirwanira mu Kirere za Leta Zunze Ubumwe za Amerika (U.S. Air Force).
Mulemba yatangaje aya makuru ku mbuga nkoranyambaga, ashyiraho amafoto ye yambaye umwambaro w’Ingabo zirwanira mu Kirere za Amerika nyuma yo kurangiza amahugurwa yasabwaga.
Uyu wahoze ari umunyamakuru, umaze igihe aba muri Leta Zunze Ubumwe za Amerika, azwi cyane mu itangazamakuru ry’imyidagaduro n’imikino mu Rwanda. Yigeze gukorana na Voice of Africa Radio, Isango Star na BTN TV, aho yayoboraga ibiganiro byibandaga ku myidagaduro n’imikino.
Kwinjira mu gisirikare cya Amerika bisaba kuzuza ibisabwa bitandukanye. Nk’uko amabwiriza y’igisirikare cya Amerika abiteganya, abashaka kwinjiramo muri rusange bagomba kuba ari abenegihugu ba Amerika cyangwa abafite uburenganzira bwo kuhatura burundu, bazwi nka Green Card holders.
Abasaba kandi bagomba kuba bujuje ibisabwa bijyanye n’imyaka y’amavuko, amashuri, ururimi rw’Icyongereza ndetse n’ubuzima. Bakora ikizamini gipima ubushobozi mu bice birimo imibare, Icyongereza, ubumenyi rusange n’ubumenyi bwa tekiniki, hanyuma bagakorerwa isuzuma ry’ubuzima.
Abujuje ibisabwa bakomeza mu mahugurwa y’ibanze ya gisirikare, aho bahabwa imyitozo ngororamubiri ndetse bakigishwa imyitwarire ya gisirikare, uburyo bwo gukora inshingano za gisirikare no kubahiriza amabwiriza.
Nyuma y’amahugurwa y’ibanze, abasirikare bashya bakunze gukora andi mahugurwa yihariye ajyanye n’umwuga cyangwa inshingano bazakora mu gisirikare, mbere yo koherezwa kuri sitasiyo yabo ya mbere y’akazi.
Kuva mu mwuga w’itangazamakuru ry’imyidagaduro mu Rwanda akajya mu gisirikare cya Amerika ni impinduka ikomeye mu rugendo rw’umwuga rwa Mulemba.
Yamenyekanye cyane ku Banyarwanda binyuze mu kazi yakoze kuri radiyo na televiziyo, cyane cyane mu biganiro by’imyidagaduro n’imikino. Mu mwaka wa 2023, Mulemba yanakoze ubukwe, nubwo muri rusange yakomeje kugirira ibanga umwirondoro w’umugore we.
Kuva arangije amahugurwa ya U.S. Air Force, inkuru ye yakomeje kuvugwa n’abo bakoranye ndetse n’abamukurikira ku mbuga nkoranyambaga, bamwifuriza ishya n’ihirwe muri iyi ntambwe nshya y’umwuga we.
