Umutwe wa FRN watangaje ko Ingabo za Repubulika Iharanira Demokarasi ya Congo (FARDC), zifatanyije n’indi mitwe irimo FDLR, Mai-Mai (Wazalendo), abacancuro n’Ingabo z’u Burundi (FDNB), bakajije ibitero mu bice bitandukanye byo mu Burasirazuba bwa RDC.
Umuvugizi wa FRN Lawrence Kanyuka yagize ati : Ihuriro rya Front pour la Refondation de la Nation (FRN) riramenyesha abaturage ba Repubulika Iharanira Demokarasi ya Congo (RDC) n’umuryango mpuzamahanga ko intambara bagabweho na Leta ya Kinshasa imaze gukaza umurego, ikaba yarahindutse intambara ikomeye ihanganisha impande zose.
FRN ivuga ko ingabo za Leta ya Kinshasa zatangije ibitero ku mpande zitandukanye , bakoresheje drones z’intambara, indege z’intambara, kajugujugu z’igisirikare, imbunda ziremereye n’ingabo zo ku butaka, zirimo abasirikare ba FARDC, abacanshuro, ingabo z’u Burundi, abarwanyi ba FDLR n’imitwe ya Mai-Mai (Wazalendo).

Iri huriro rivuga ko ibi bitero bikomeye byibasira ibice bitandukanye kandi bituwe n’abaturage b’abasivili.
FRN ivuga ko Ku wa Kane, tariki ya 19 Ugushyingo 2026, ahagana saa 23:00 z’ijoro, abarwanyi ba FDLR, bafashijwe n’abarwanyi ba Nyatura, binjiye mu mudugudu wa Lusowa, mu gace ka Kanyabayonga, muri Teritwari ya Rutshuru bahitana Abantu batandatu abandi benshi barakomereka .
kuri uyu wa Gatanu, tariki ya 20 Ugushyingo 2026, ahagana saa 05:45 za mu gitondo, ingabo z’ihuriro rishyigikiye Leta ya Kinshasa bagabye ibitero by’imbunda ziremereye icyarimwe ku duce twa Buhimba na Kinyumba, muri Teritwari ya Masisi.
na none kuri uyu wa Gatanu, izi ngabo zakajije ibitero ku mpande zitandukanye:
Saa 06:00: Zagabye igitero kuri Chambombo, muri Teritwari ya Kalehe.
Saa 06:10: Zafunguye indi nzira y’urugamba, zigaba igitero kuri Bunyakiri, na ho muri Teritwari ya Kalehe.
Saa 06:15: Zakajije ibisasu by’imbunda ku gace ka Point Zéro, mu karere ka Minembwe.
FRN ivuga ko mu gihe ibi bitero bikomeje gukaza umurego no guhitana abantu, idashobora gukomeza kurebera gusa , mu gihe abaturage bayo bakomeje kwicwa mu gihe umuryango mpuzamahanga ukomeje guceceka.
Iri huriro rivuga ko ingabo zabo ziri mu bikorwa ku rugamba, zigiye gukomeza kurinda abaturage b’abasivili ibitero bikomeye bakomeje kugabwaho Impande zitandukanye.



