Mu karere ka Rubavu hafunguwe ishuri ry'imyuga n'ubumenyingiro ryitwa "Innovate Technical College TSS" rifite umwihariko wo gucura icyuma cyose cyaba icy'imodoka cyangwa imashini iyo ariyo yose (Manufacturing Technology) bifashishije imashini zavuye mu Budage no gutunganya imiyoboro ya murandasi (Networking and Internet Technology).
Kuri uyu wa mbere taliki 9 Ugushyingo 2026 habaye imurikabikorwa ryatumiwemo ababyeyi , abanyenganda ndetse n'abayobozi batandukanye aho beretswe ibikorwa bizakorerwa muri iki kigo. Abitabibiriye iki gikorwa batashye banyunzwe kandi bafite akanyamuneza ku maso biturutse ku byo biboneye.
Abanyeshuri biga muri ikigo baganiriye na Inumanews bavuze ko ari amahirwe akomeye babonye muri aka karere ka Rubavu.Umunyeshuri wiga muri iki kigo witwa Umurisa Chanceline muri Level ya 3 ibijyanye na Networking yagize ati :" iri shuri twahasanze ibikoresho bihagije ndetse n’abarezi bafite ubumenyi buhagije ikaba ariyo mpamvu twizeye umusaruro uhagije tuzereka ababyeyi bacu mu gihe kiri imbere."
Mugenzi we witwa Ingabire Rosine wiga Level 3 nawe yiga ibijyanjye na Networking avuga ko iki kigo cyaziye igihe ndetse biteze impinduka mu mashuri y'ubumenyingiro. Yagize ati :"Nkurikije igihe maze muri iki kigo maze kugira ubumenyi butandukanye , kuko nkigera hano ntabwo narinzi gukoresha Computer ( Mudasobwa) , ariko ubu maze kubimenya nahuye na bagenzi banjye bafite ubumenyi butandukanye tugenda tubusangira ndabona ejo ari heza ."
Singirankabo William, Umuyobozi w'iki kigo yagarutse kuri byinshi iri shuri rigiye guhindura mu burezi , aho yagize ati: "Iki kigo kije ari igisubizo kuko ibijyanye n'ubushomeri bugiye kugabanuka mu rubyiruko , kuko Abanyeshuri bari kwiga ibigezweho ku isoko ry'umurimo ndetse abazajya bosoza amasomo bazahita babona akazi bakora , ubu iki kigo turashaka guca ubushomere mu rubyiruko ndetse turateganya kuzana na gahunda yo kwiga by'igihe gito Short courses uzajya arangiza kwiga hano ajye ahita ayoboka umurimo ."
Mupenzi Pacifique, uhagarariye Uburezi mu karere ka Rubavu , yashimiye iki kigo , avuga ko iri shuri rije ari igisubizo , mu magambo ye yagize ati: "iri shuri rije ari igisubizo kuko rizagabanya ubushomeri cyane cyane mu rubyiruko kuko ibyo batangiye kwiga nibyo Leta yifuza , nk'ubuyobozi bw’Akarere turashishikariza Ababyeyi kohereza Abanyeshuri muri iki kigo kuko bazakuramo ubumenyi buhagije."
Martin Helmuth Vincentz uri mu baterankuga ba mwamba muri iki kigo avuga ko igitekerezo yagikuye ku nshuti ye ituye mu Rwanda yamukundishije iki gihugu , Martin ati:" Nk'uwaje mpagarariye inshuti z'’u Rwanda mu Budage ,tumaze imyaka irenga 20 duteza uburezi bw’u Rwanda imbere , twizeye ko iki kigo nacyo kizahindura ubuzima bw’uburubyiruko bw’u Rwanda."
Innovate Technical College TSS ni ikigo gifite ubushobozi bwo kwakira abanyeshuri barenga 100 gusa ku ikubitiro cyatangiranye 34 aho biga n'ururumi rw'ikidage.iki kigo giherereye mu murenge wa Nyundo, Akagali ka Terimbere , Umudugudu wa Gahama .
