Perezida wa Leta Zunze Ubumwe za Amerika, Donald Trump, yashyize umukono ku iteka rya perezida rigena ko icyumba akoreramo kizwi nka Oval Office, kiri muri White House, gihinduka urwibutso rw’igihugu, mu rwego rwo gukumira abaperezida bazamusimbura kuzajya bagihindura uko babyifuza.
Trump, wahoze ari rwiyemezamirimo n’umushoramari ukomeye mu bijyanye n’ubwubatsi, yakoze impinduka zikomeye mu miterere y’ibiro bya perezida wa Amerika muri manda ye ya kabiri. Muri izo mpinduka harimo kongeramo imitako myinshi ikozwe muri zahabu.
Ku wa Kane, Trump yabwiye abanyamakuru ati: “Turimo kugihindura urwibutso rw’igihugu. Ntabwo bizongera kwemerwa ko hagira umuntu ugihindura, ugisenya cyangwa ugisenyera hasi kugira ngo yubake ikindi kintu gifite imiterere itandukanye ho gato.”
Iri teka Trump yashyizeho umukono rije nyuma y’amezi make asenye igice cyose cya White House kizwi nka East Wing. Icyo gikorwa cyateje impaka ndetse kijyanwa mu nkiko.
Uyu mushinga wo gusenya no kongera kubaka icyo gice ntiwari wemejwe n’Inteko Ishinga Amategeko ya Amerika. Icyakora, imirimo y’ubwubatsi yarakomeje, hakaba hari gahunda yo kuhagura hakubakwa inyubako nshya izajya yakira ibirori n’indi mihango itandukanye.
Ubusanzwe, abaperezida ba Amerika bafite ububasha bwo kugira impinduka bakora muri White House, ariko imishinga minini ihindura imiterere y’inyubako isaba uruhushya rw’Inteko Ishinga Amategeko.
Iteka Trump yashyizeho umukono ku wa Kane rivuga ko icyumba cya Oval Office, ari cyo perezida akoreramo, hamwe n’ibindi byumba bimwe na bimwe bikikije, bigomba gufatwa nk’urwibutso rw’igihugu.
Gusa, iyo nyandiko isobanura ko iri teka ridakuraho ububasha bwa perezida bwo kongera gutaka icyo cyumba, guhitamo ibikoresho byo mu biro cyangwa gukora impinduka zisanzwe zijyanye n’imikorere n’umutekano, igihe cyose zitahinduye mu buryo bukomeye imiterere y’inyubako ifite amateka n’agaciro mu by’imyubakire.
Trump yagize ati: “Dukunda Oval Office kandi ni ikirango, kimwe na White House ubwayo. Ni ikirango cy’igihugu cyacu n’ubuhangange bwacyo.”
Yongeyeho ko abayobozi batandukanye bo mu bihugu byagiye bimusura mu mezi ashize bamushimiye ku mpinduka yakoze muri icyo cyumba.
Trump yavuze kandi ko White House na Oval Office byari bimaze igihe bikeneye gusanwa mbere y’uko ahakorera impinduka. Yavuze ko inyubako yari yarangiritse cyane, aho hari amadirishya yavunitse, inkuta zitameze neza ndetse n’amabuye yari yarasataguritse.
Iri teka rije mu gihe impinduka Trump akomeje gukora kuri White House, zirimo izijyanye n’imiterere y’inyubako n’imitako yayo, zikomeje guteza impaka ku bubasha bwa perezida bwo guhindura inyubako ifite amateka akomeye muri Amerika.
