Umugabo ukomoka mu Bwongereza wanduye virusi ya Ebola muri Repubulika Iharanira Demokarasi ya Congo (DRC) agiye gusubizwa mu gihugu cye kugira ngo ahabwe ubuvuzi bwihariye.
Uyu mugabo ni we mwongereza wa mbere wemejwe ko yanduye Ebola muri iki cyorezo giheruka, cyatewe n'ubwoko bwa virusi ya Ebola buzwi nka Bundibugyo, budakunze kugaragara ariko bushobora guteza impfu nyinshi .
Iki cyorezo kimaze guhitana abantu barenga 5.000
Kugeza ubu, ntiharamenyekana igihe indege izamufasha gusubira mu Bwongereza izahagurukira.
Mbere yaho, umuvugizi wa Guverinoma y'Ubwongereza yari yatangaje ko igihugu gifite uburyo n'ingamba zihamye zo guhangana n'ibibazo nk'ibi, ashimangira ko ibyago byo kuba uwo murwayi yakwanduza abandi bantu mu Bwongereza bikiri bike.
Ibiro ntaramakuru Reuters, byifashishije amakuru yo mu nyandiko y'imbere mu kigo cy'itangazamakuru BBC News bitabashije kubona ubwabyo, byatangaje ko uwo mugabo wanduye Ebola ari umukozi mu rwego rw'ubuvuzi.
Kwandura Ebola mu Bwongereza biturutse ku bantu baba bayivanye mu bindi bihugu ni ibintu bidakunze kubaho. Kandi kugeza ubu, nta muntu wari warapfuye azize Ebola mu Bwongereza.
Mu mateka y'Ubwongereza, abantu bane ni bo bigeze kwemezwa ko banduye iyi virusi. Umwe yayanduye mu 1976 biturutse ku mpanuka yabereye muri laboratwari, mu gihe abandi batatu bari abakozi bo mu rwego rw'ubuvuzi bari bitabiriye ibikorwa byo guhangana n'icyorezo cya Ebola cyibasiye Afurika y'Iburengerazuba hagati ya 2014 na 2015.
Muri iki cyorezo gishya cya Ebola, ari na cyo cya 17 cyanditswe ku isi, abantu barenga 10.000 bamaze kwemezwa ko banduye iyi virusi mu burasirazuba bwa Repubulika Iharanira Demokarasi ya Congo, kuva cyatangazwa ku wa 5 Gicurasi uyu mwaka.
Iki cyorezo kiri mu byahitanye abantu benshi mu mateka ya Ebola, kikaba ari na cyo kimaze guhitana abantu benshi mu byigeze kugaragara muri Repubulika Iharanira Demokarasi ya Congo. Amakuru yatangajwe agaragaza ko kugeza mu mpera z'ukwezi gushize, umubare w'abapfuye mu banduye wari ugeze kuri 48,6%.
