Mu ijoro rishyira kuri iki Cyumweru tariki 25 Ukwakira 2026, Agakiriro ka Gisozi kibasiwe n’inkongi y’umuriro yangije byinshi.
Icyateye iyi nkongi kugeza ubu ntabwo kiramenyekana cyane ko yabaye mu masaha y’igicuku abantu bose batashye. Yibasiye cyane igice gikorerwamo inzu zicuruza ibikoresho by’ubwubatsi, ndetse n’izikorerwamo ubukorikori.
Polisi y’u Rwanda yahise itabara, itangira kuzimya iyi nkongi, gusa kugeza muri iki gitondo haracyagaragara umwotsi, ndetse ibikorwa bikorerwa muri aka gakiriro byabaye bihagaze.
Agakiriro ka Gisozi kamaze igihe kadasiba kwibasirwa n’inkongi z’umuriro, aho nibura habarwa inshuro umunani kamaze gushya kuva mu 2017.
