Umuhanzi w’Umunya-Jamaica ukora injyana ya Dancehall, Konshens, yahakanye ibyo bamwe bamushinja byo kutita bihagije ku muziki wo muri Kenya na Uganda, ashimangira ko urukundo akunda Afurika y’Iburasirazuba rutagarukira gusa ku gutaramira abakunzi be muri ibi bihugu.
Konshens yavuze ko ashyigikira umuziki wo muri aka karere binyuze mu mikoranire yagiranye n’abahanzi baho, ndetse no kuba amaze imyaka akorana n’abahanzi batandukanye bo muri Afurika y’Iburasirazuba.
Mu butumwa yasangije abantu ku mbuga nkoranyambaga, Konshens yasabye abashidikanya ku rukundo akunda aka karere kugaragaza abandi bahanzi bo muri Jamaica bagaragaje urukundo n’ubufatanye nk’ibyo yagiye agaragaza.
Yagize ati: “Mumbwire umuhanzi wagaragaje urukundo rwinshi kandi agashyigikira abahanzi bo muri Afurika y’Iburasirazuba kurusha abandi mu myaka yashize.”
Konshens agaragaza indirimbo yakoranye n’abahanzi bo muri Afurika y’Iburasirazuba
Uyu muhanzi wamamaye mu ndirimbo “Gal a Bubble” yagaragaje ko indirimbo yakoranye n’abahanzi bo muri aka karere ari kimwe mu bimenyetso byerekana umubano afitanye n’umuziki waho.
Yongeyeho ati: “Mugerageze gutondeka indirimbo zose nakoranye n’abahanzi bo muri aka karere, harimo izindi zakozwe mu buryo bwo kuzivugurura.”
Mu bahanzi yagarutseho harimo Umunya-Uganda A Pass, bakoranye indirimbo “Gamululu”, ndetse n’imikoranire ye n’itsinda ry’abahanzi bo muri Kenya rya Ethic Entertainment mu ndirimbo “Figa”, yasohotse mu buryo bwo kuvugurura indirimbo yari isanzwe ihari.
Yavuze kandi ku mishinga yahuje Toxic na Backbenchers, agaragaza ko imikoranire ye n’abahanzi bo muri aka karere imaze igihe kandi itagarukira ku bitaramo gusa.
Konshens yumvikanishije ko uruhare rwe mu guteza imbere umuziki wo muri Afurika y’Iburasirazuba rudakwiye gupimwa gusa harebwa inshuro yagiye kuhakorera ibitaramo, ahubwo ko n’indirimbo yakoranye n’abahanzi baho zikwiye kwitabwaho.
Konshens avuga ko ashyigikiwe n’abakunzi be bo muri Afurika y’Iburasirazuba
Mu bihe byashize, Konshens yagiye agaragaza ko akunda abakunzi be bo muri Kenya, igihugu amaze igihe afiteho igikundiro.
Muri Mutarama 2022, ubwo yashimiraga abakunzi be nyuma yo gusura Nairobi, yanisekeje avuga ko yihaye izina rya Kenya rya “Konshens Otieno”.
Mu bihe biheruka, yongeye kugaruka ku mubano afitanye n’abakunzi be bo muri Afurika y’Iburasirazuba, anavuga ku mpinduka zabaye kuri gahunda zimwe na zimwe z’ibitaramo, ashimangira ko yifuza guha abakunzi be bari bamaze imyaka bategereje kumubona igitaramo cyiza kandi kibanyuze.
Ubutumwa bwe bushya bwibanze ku bufatanye hagati y’abahanzi, aho yagaragaje ko indirimbo amaze gukorana n’abahanzi bo muri aka karere ari gihamya y’umubano umaze igihe afitanye n’umuziki waho.
