Abahanzi Pallaso na Alien Skin bongeye gushyamirana mu magambo, nyuma y’uko Alien Skin ashidikanyije ku kuba Pallaso akwiriye kwitwa umuhanzi.
Mu kiganiro yagiranye na YouTuber wo muri Uganda, Alien Skin, uzwi ku ndirimbo “Fagone Forest”, yavuze ko Pallaso adakwiriye kwitwa umuhanzi, ahubwo ko akwiriye gufatwa nk’“umuvandimwe w’umuhanzi”.
Alien Skin yakomeje avuga ko Pallaso agomba gukora cyane no kwerekana ubushobozi bwe mbere yo guhabwa izina ry’umuhanzi.
Pallaso na we yamusubije, amushinja gushaka kwamamara no gukomeza kumuvugaho kugira ngo akomeze kuvugwa mu ruhame.
Pallaso yagize ati: “Ubushize na bwo namwumvise amvugaho. Ndasobanukiwe ko nta cyo ahugiyemo. Ahora agaragara ashaka kongera kumenyekana; ni umuswa.”
Aya magambo yongeye gukongeza umwuka mubi umaze igihe hagati y’aba bahanzi bombi, bakunze kugirana ibibazo no guterana amagambo mu ruhame.
Mu gihe Alien Skin yashidikanyije ku mwanya Pallaso afite mu muziki, Pallaso we yamaganye ibyo yavuze, abifata nk’uburyo bwo gushaka gukurura abantu no kongera kuvugwa.
