Umuraperi Fik Fameica yatangaje ko ateganya gukora igitaramo gikomeye ahitwa Kololo Airstrip muri Uganda, muri Mutarama 2027, mu rwego rwo kwizihiza imyaka 10 amaze mu muziki.
Uyu muhanzi yabitangaje mu kiganiro yakoreye kuri TikTok Live, avuga ko iki gitaramo kizaba umwanya wo kwizihiza imyaka icumi amaze akora cyane, asohora indirimbo zakunzwe kandi ashimisha abakunzi be.
Fik Fameica yagize ati: “Maze imyaka 10 nkora cyane, nshimisha abakunzi banjye kandi ngira uruhare mu iterambere ry’inganda z’umuziki. Nzi neza ko mwese abakunzi banjye munyishimira nanjye ndabishimira. Nishimiye gutangaza ibirori tugiye kugira. Tuzakora igitaramo muri Mutarama 2027, kandi aho kizabera hamaze kumenyekana.”
Uyu muraperi yemeje ko Kololo Airstrip ari ho hazabera icyo gitaramo, nubwo itariki nyayo kizaririmbiraho itaratangazwa.
Yongeyeho ko azatangaza andi makuru arambuye namara gusubira muri Uganda.
Yagize ati: “Ariko reka mbanze ngaruke muri Uganda. Icyo ni cyo mfite mu bitekerezo byanjye, nta kindi.”
Kuri ubu, Fik Fameica ari mu Buyapani aho yagiye gutaramira abakunzi b’umuziki, mu gihe akomeje imyiteguro y’ibirori byo kwizihiza imyaka icumi amaze mu ruganda rw’umuziki.
Iki gitaramo gitegerejweho kuba umwanya ukomeye kuri uyu muhanzi, uzaba yizihiza urugendo rwe rw’imyaka 10 mu muziki wa Uganda.
