Umuhanzi Eddy Kenzo yashyigikiye amabwiriza Perezida wa Uganda, Yoweri Museveni, yashyizeho mu 2023 agamije guhagarika ibikorwa byo gutwika ibiti no gucuruza amakara mu bice bimwe na bimwe by’icyo gihugu. Kenzo avuga ko ayo mabwiriza agamije kurengera amashyamba ya Uganda, aho kuba ukubuza abaturage kubona ibicanwa byo gutekesha.
Kenzo, wavuze ko azi neza ubuzima bwo mu bukene, yavuze ko iki cyemezo cyashyizwemo politiki, ku buryo bamwe bagifashe nk’aho ari itegeko ribuza Abanya-Uganda gutekesha amakara burundu.
Yasobanuye ko gutema ibiti mu buryo butagenzuwe bishobora kwangiza amashyamba, ibidukikije ndetse n’imiterere y’ikirere. Yaburiye ko Uganda ishobora gutakaza ubwiza nyaburanga bwayo, bwatumye yitwa Isaro rya Afurika (Pearl of Africa).
Uyu muhanzi kandi yagaragaje impungenge ku ngaruka amakara ashobora kugira ku buzima, asaba Abanya-Uganda gushaka no gukoresha ubundi buryo bwo guteka butangiza ikirere n’ubuzima.
Ku wa 19 Gicurasi 2023, Perezida Museveni yashyizeho Iteka rya Perezida No. 3, ribuza gutwika ibiti hagamijwe gukora amakara no kuyacuruza mu turere twa West Nile, mu Majyaruguru ya Uganda, Karamoja no mu gace ka Teso.
Icyakora, iri tegeko ryateje impaka, cyane cyane ku kibazo cyo kumenya niba ibindi bicanwa bishobora kuboneka ku giciro abaturage bashobora kwishyura, dore ko ingo nyinshi zishingiye ku makara mu guteka.
Ku wa 14 Ukwakira 2026, Perezida w’Inteko Ishinga Amategeko ya Uganda, Jacob Oboth, yahagaritse ishyirwa mu bikorwa ry’iri tegeko by’agateganyo, ategereje raporo ya Guverinoma ku buryo ryashyizwe mu bikorwa ndetse n’intambwe imaze guterwa mu kugeza ku baturage ubundi buryo bwo kubona ingufu zo guteka. Guverinoma yasabwe kugeza amakuru mashya ku Nteko ku wa 21 Ukwakira 2026.
Ibyo Eddy Kenzo yatangaje bije mu gihe muri Uganda hakomeje impaka ku buryo bwo kurengera amashyamba n’ibidukikije, mu gihe abaturage na bo bakeneye kubona ibicanwa bihendutse kandi bibafasha gutegura amafunguro ya buri munsi.
