Joseph Kabila wahoze ari Perezida wa Repubulika ya Demokarasi ya Congo (DRC) yatangajwe ko ari umukuru w'umutwe mushya wa politike na gisirikare, nkuko bikubiye mu itangazo ryasomwe ku wa mbere mu mujyi wa Goma wo mu burasirazuba bw'icyo gihugu.
Uwo mutwe w'inyeshyamba, witwa 'Front pour la Refondation de la Nation' (FRN), uvuga ko washinzwe n'abashaka guhuza imbaraga zabo n'amikoro muri gahunda y'igikorwa gihuriweho.
Mu itangazo ryasomwe na Claude Ibalanky, wahoze ari umujyanama mukuru ndetse n'ambasaderi wa Perezida Félix Tshisekedi yatumaga mu bihugu binyuranye, ubu akaba akorana n'uwo mutwe, abawushinze bavuze ko intego yabo ari "ukubohora" igihugu.
Nta cyo abategetsi b'i Kinshasa bari batangaza ku ishingwa rya FRN.
Uretse abagize AFC/M23 na Twirwaneho, byitezwe ko FRN izajyamo n’abandi bantu batavuga rumwe n’ubutegetsi bwa Perezida Félix Tshisekedi.
Gen Maj Makenga kandi ni Umugaba Mukuru w’ishami rya gisirikare rya FRN.
FRN ishinzwe nyuma y’iminsi mike Kabila agejeje ubutumwa ku Banye-Congo, abamenyesha ko Leta ya RDC yanze kumva inama yayigiriye muri Gicurasi 2025 ku buryo iki gihugu cyabona amahoro.
Kabila yavuze ko RDC isigaye iyobojwe igitugu kandi ko Tshisekedi yahisemo gukomeza intambara adashobora gutsinda kubera inyungu za politiki ayifitemo.
Uyu munyapolitiki wayoboye RDC kuva mu 2001 kugeza mu 2019 yasabye Abanye-Congo guhaguruka bakarwanira igihugu cyabo, abateguza ko vuba cyane azabatangariza urugendo rushya yatangiye.
Kuva muri Gicurasi 2025, Kabila aba mu Mujyi wa Goma ugenzurwa na AFC/M23. Hari ubwo ajya mu bihugu bitandukanye bya Afurika muri gahunda za dipolomasi
