Umuvugizi w'ihuriro AFC/M23 Lawrence Kanyuka yavuze ko ibitero byakajije umurego i Masisi na Minembwe.
Kanyuka yagize ati: Kuri iki Cyumweru, tariki ya 11 Ukwakira 2026, guhera saa tatu za mu gitondo (09h00), ingabo zishyize hamwe zishyigikiye ubutegetsi bwa Kinshasa zakajije ibitero byazo icyarimwe byibasiye uduce twa Kacyayi, Kumungoti na Marangara, muri teritwari ya Masisi, mu Ntara ya Kivu y’Amajyaruguru.
Ibyo bitero byagabwe n’ingabo zirwanira ku butaka, bikaba byarushijeho gukaza ikibazo cy’ubutabazi bw’abaturage muri ako karere.
Ibitero kandi byagabwe i Kuwihene no mu nkengero zaho, mu karere ka Minembwe
ahagana saa sita n’iminota 15 za mu gitondo (12h15), izo ngabo zakajije ibitero byazo byo ku butaka byerekejwe i Kuwihene no mu nkengero zaho, mu nzira ya Rugezi, mu karere ka Minembwe.
Nk’uko iri tangazo ribivuga, izo ngabo zashyize ku murongo w’imbere abarwanyi bo mu mutwe wa FDLR, bafatanyije n’abacanshuro b’abanyamahanga.
Ibyo bitero byagabwe hifashishijwe ibitero by’ingabo zirwanira ku butaka n’amasasu y’intwaro ziremereye. Byateje impfu z’abantu ndetse bituma abaturage benshi b’abasivili bahunga ingo zabo, bimukira ahandi bashaka umutekano.
Kanyuka yatanze Ubutumwa ku Banye-Kongo no ku muryango mpuzamahanga
Iri tangazo riraburira abaturage ba Repubulika Iharanira Demokarasi ya Kongo n’umuryango mpuzamahanga ku bijyanye n’ihonyorwa ry’amasezerano yo guhagarika imirwano, ndetse no ku ikoreshwa ry’abacanshuro b’abanyamahanga.
Rivuga ko gukoresha abo bacanshuro binyuranyije n’amasezerano mpuzamahanga agenga ikoreshwa ry’abacanshuro mu ntambara.
