Abahanzi Nelly Ngabo na Christopher Muneza bagiye guhurira ku rubyiniro mu gitaramo cyiswe Rwanda Convention kizabera muri Canada .
Ibi byatangajwe n’abategura Rwanda Convention kuri uyu wa 9 Ukwakira 2026, ubwo basangizaga abakurikira ibikorwa byabo ku mbuga nkoranyambaga integuza irimo amafoto y’abo bahanzi bombi.
Mu butumwa bwaherekeje ayo mafoto, abategura iki gikorwa bagize bati: “Turabamenyesha ko abasore banyu aribo Nel Ngabo na Christopher Muneza, bazaririmba muri Rwanda Convention.”
Rwanda Convention ni igikorwa gisanzwe gitegurwa na sosiyete Afro Hub Entertainment, ku bufatanye n’Abanyarwanda baba mu mahanga. Gikunze kubera mu bikorwa bitandukanye bigamije guhuza Abanyarwanda, kubafasha gusabana no guteza imbere imibanire yabo, bagakora n’igitaramo cy’imyidagaduro.
Mu gitaramo giheruka, cyabereye muri Leta Zunze Ubumwe za Amerika, mu gace ka Dallas-Fort Worth, abahanzi barimo The Ben, Meddy na Element Eleeeh ni bamwe mu bari bacyitabiriye. Icyo gikorwa cyabaye kuva ku wa 4 kugeza ku wa 6 Nyakanga 2025, gihuzwa n’ibirori byo kwizihiza isabukuru ya 31 yo Kwibohora.
Uretse ibitaramo, Rwanda Convention inategura ibiganiro bigamije gufasha Abanyarwanda baba mu mahanga kumenya amahirwe ari mu Rwanda, by’umwihariko ayerekeye ishoramari n’iterambere ry’igihugu.
Abategura iki gikorwa bateganya ko Nel Ngabo na Christopher Muneza bazasusurutsa abazitabira igitaramo cyo ku mugoroba wo ku wa 10 Ukwakira 2026 muri Canada.
