Navi Pillay yegukanye igihembo cy’Amahoro cyitiriwe Nobel kubera uruhare rwe mu guharanira amahoro n’amategeko mpuzamahanga
Navi Pillay, wahoze ari Komiseri Mukuru w’Umuryango w’Abibumbye (ONU) ushinzwe uburenganzira bwa muntu, yegukanye igihembo cy’Amahoro cyitiriwe Nobel.
Akanama gashinzwe gutanga ibihembo bya Nobel muri Noruveje kavuze ko Pillay yahembwe kubera uruhare yagize mu bikorwa byo guharanira amahoro no kubahiriza amategeko mpuzamahanga.
Mu gutangaza uwatsindiye icyo gihembo, Jørgen Watne Frydnes, uyobora ako kanama, yavuze ko atabashije kuvugana na Pillay kuri telefone. Yongeyeho aseka ati: “Ubutumwa namuha ni ubu: niwabona nimero ya telefone yo muri Noruveje iguhamagaye, ndakwinginze uzitabe.”
Navi Pillay, ufite imyaka 85, yavukiye i Durban muri Afurika y’Epfo. Yabaye Perezida w’Urukiko Mpuzamahanga Mpanabyaha rwashyiriweho u Rwanda (TPIR/ICTR), rwari rufite icyicaro i Arusha muri Tanzania.
Yayoboye urwo rukiko kuva mu mpera z’imyaka ya 1990 kugeza mu ntangiriro z’imyaka ya 2000, mu gihe rwacaga imanza z’abaregwa uruhare muri Jenoside yakorewe Abatutsi mu Rwanda muri Mata 1994.
