Umutekano uracyifashe nabi mu gace ka Ufamandu 1er, muri Teritwari ya Masisi, mu Ntara ya Kivu y’Amajyaruguru, aho imirwano imaze iminsi ihanganisha abarwanyi ba AFC/M23 n’ingabo za Repubulika Iharanira Demokarasi ya Congo (FARDC), zifatanyije n’abarwanyi ba Wazalendo.
Kuri uyu wa Kane tariki ya 8 Ukwakira, imirwano yibanze cyane cyane mu gace ka Kasaki no mu nkengero z’agace ka Ngungu.
Umunyamakuru wa Inuma News uri muribi bice yadutangarije ko imirwano yongeye kubura uhereye kuri uyu wa Gatatu, ikaba ikomeje kuri uyu wa Kane.
Kuva mu masaha ya mbere ya mu gitondo, muri ako gace humvikanye urusaku rw’imbunda ziremereye n’izoroheje.
Impande zombi zihanganiye kugenzura Ngungu, agace gafatwa nk’ingenzi kuko kari mu majyepfo ya Teritwari ya Masisi.
Iyi mirwano mishya ibaye mu gihe abarwanyi ba AFC/M23 n’ingabo za FARDC zifatanyije na Wazalendo bamaze hafi icyumweru bahanganye mu bice bitandukanye bigize Ufamandu 1er.
Amakuru ahari avuga ko FARDC n’abafatanyabikorwa bayo bagenzura ahanini Miko, Kaleta, Katuunda, Remeka, Nyamiri, Kamuhobe na Miano.
Ku rundi ruhande, AFC/M23 ivuga ko iri mu bice bya Kasaki na Ngungu, aho imirwano ikomeje kubera nkuko Umuvugizi wa M23 mubya Politiki Dr Oscar Balinda yabihamirije Abanyamakuru ku munsi wo ku wagatatu taliki 7 Ukwakira .
