Abasirikare ba Eritrea binjiye mu majyaruguru ya Ethiopia, berekeza mu bice bya Tigray, aho imirwano yongeye kubura hagati y’igisirikare cya Leta ya Ethiopia n’abarwanyi bo muri iyo ntara. Ibi byatangajwe n’abaturage bo mu mujyi wa Adigrat baganiriye n’itangazamakuru .
Imirwano yongeye kubura hashize ibyumweru bibiri, nyuma y’amezi yari amaze kurangwa n’umwuka mubi n’ukutumvikana hagati ya Leta ya Ethiopia n’umutwe wa TPLF uyobora Tigray.
Impande zombi zagiye zishinjanya kutubahiriza amasezerano y’amahoro yashyizweho umukono mu 2022, yari yarahagaritse intambara yari imaze imyaka ibiri muri Tigray.
Leta ya Ethiopia ishinja Eritrea gufasha TPLF, ariko ubuyobozi bwa Eritrea bwakomeje guhakana ibyo birego.
Mu mpera z’icyumweru gishize, abarwanyi ba TPLF bavuye mu mujyi wa Mekelle, ubu ukaba ugenzurwa n’igisirikare cya Ethiopia.
Abaturage bo muri Adigrat bavuga ko babonye urutonde rurerure rw’amakamyo ya gisirikare cya Eritrea aturuka ku mupaka wa Zalambessa, anyura muri Adigrat yerekeza i Edaga Hamus, hagati ya Adigrat na Mekelle.
Umwe mu baturage yabwiye BBC ati: “Nabonye amakamyo agera kuri 40 yari atwaye abasirikare. Yerekeje mu majyepfo.”
Undi muturage yavuze ko yabonye amakamyo ari hagati ya 20 na 30, amwe muri yo atwaye intwaro zikomeye, zirimo n’intwaro zirasa indege. Yavuze kandi ko hari abandi basirikare bagendaga n’amaguru.
Hari andi makuru avuga ko amakamyo agera kuri 60 atwaye abasirikare yaba yaragaragaye yerekeza mu misozi iri hafi ya Edaga Hamus.
Kugaruka kw’abasirikare ba Eritrea muri Tigray byateje impungenge mu baturage benshi bo muri iyo ntara, cyane ko bibuka ubwicanyi n’ibindi bikorwa by’ubugizi bwa nabi abasirikare ba Eritrea bashinjwe mu ntambara yabaye hagati ya 2020 na 2022.
umuyobozi mukuru wa Ethiopia, Abraham Belay, yashinje Eritrea kugira uruhare rutaziguye mu mirwano yongeye kubura. Yavuze ko abasirikare benshi ba Eritrea bishwe, abandi bagafatwa mpiri, anavuga ko Ethiopia izafata ingamba zikomeye mu gusubiza ibyo bikorwa.
