Amashuri yisumbuye ari hagati ya 400 na 500 mu Bufaransa yafunzwe kuri uyu wa Mbere, nyuma y’imyigaragambyo y’abanyeshuri imaze iminsi ikomeje, ikaba yaranagejeje ku guhangana hagati yabo na Polisi.
Minisitiri w’Uburezi, Édouard Geffray, yatangaje ku Cyumweru ko amasomo azahagarikwa muri ayo mashuri kubera ko umutekano udahagije.
Yavuze ko amashuri 24 amaze gutwikwa cyangwa gusahurwa kuva imyigaragambyo yatangira.
Abanyeshuri ibihumbi bashyigikiye iyi myigaragambyo basaba Leta kongera umubare w’abarimu, kugabanya ubucucike bw’abanyeshuri mu mashuri ndetse no kuvugurura inyubako z’amashuri zishaje.
Iyi myigaragambyo yatangiriye i Paris mu cyumweru gishize, ariko ikomeje gukwirakwira no mu yindi mijyi irimo Montpellier, Nantes na Marseille.
Minisitiri w’Ubutabera, Gérald Darmanin, yavuze ko amashuri 735 muri 3.700 yo mu Bufaransa yari amaze guhungabanywa n’imyigaragambyo kugeza ku wa Gatanu.
Geffray yashinje bamwe mu baharanira ibitekerezo bya politiki, cyane cyane abo ku ruhande rw’iburyo bukabije, kwivanga mu myigaragambyo y’abanyeshuri.
Yatangaje kandi ko abakozi 78 bo mu mashuri bakomeretse.
Minisitiri w’Ubutegetsi bw’Igihugu, Laurent Nuñez, yavuze ko ku wa Gatanu abantu 1.747 bafashwe.
Abateguye imyigaragambyo basabye ko ikomeza no ku wa Kabiri, bavuga ko Leta itarafata ingamba zifatika zo gukemura ibibazo byabo.
