Nel Ngabo yakomereje urugendo rwe muri Leta Zunze Ubumwe za Amerika, nyuma yo gutaramira muri Canada mu gitaramo “Beyond Borders” cyahuriyemo abahanzi barimo Kevin Kade, Element EleéeH na DJ Brianne, ndetse na The Ben wacyitabiriye atunguranye.
Ni uruzunduko agiye gukora rushingiye ku kazi kuko yatumiwe kuririmba mu gitaramo kizahuriza hamwe abacuruzi, abashoramari, abayobozi b’ibigo n’abakomoka muri Afurika y’Iburasirazuba batuye muri Amerika n’ahandi ku Isi.
Igitaramo Nel Ngabo azaririmbamo kizaba kigamije gususurutsa abitabiriye umusangiro w’Ihuriro ryitwa “East Africa Business Network (EABN)”, uzaba uri mu bikorwa by’inama ngarukamwaka yaryo yiga ku bucuruzi n’ishoramari.
Yifashishije imbuga nkoranyambaga ze kuri uyu wa 30 Nzeri 2026, Nel Ngabo yasangije integuza y’icyo gitaramo ararikira abatuye i Dallas kuzaza akabataramira.
Yanditse ati: “Dallas bimeze bite? Muzabe muhari mutaramane nanjye muri EABN.”
Biteganyijwe ko icyo gitaramo kizaba mu ijoro risoza inama ya 21 ngarukamwaka ya EABN Trade & Investment Conference, mu ijoro ry’itariki 3 Ukwakira 2026.
