Edward Rukidi Kijanangoma Nyabongo II w'imyaka 56 arimikwa kuri uyu wa kabiri kugira ngo abe Umwami mushya w'Abatooro muri Uganda. Kijanangoma yari amaze imyaka irenga 20 akora umwuga w'itangazamakuru, harimo no gukorera ikigo cya leta ya Uganda, UBC.
Asimbuye Umwami Oyo Nyimba Kabamba Iguru Rukidi IV, witabye Imana mu kwezi gushize azize kanseri afite imyaka 34. Oyo yari yabaye umwami mu 1995 afite imyaka itatu gusa.
Ishyirwaho rya Kijanangoma ryateje impaka. Abegereye umuryango w'ibwami bavuga ko Oyo yasize umuhungu ndetse n'urwandiko rw'irage rusaba ko ari we wagombaga kumusimbura. Ariko uwo mwana ntiyigeze agaragazwa ku mugaragaro cyangwa ngo agezwe imbere y'akanama k'abantu 21 bo mu muryango w'Ababiito bashinzwe gutora umwami.
Ako kanama kavuze ko gakurikije imigenzo y'Abatooro, maze gahitamo Kijanangoma. We na Oyo bombi ni abuzukuru b'Umwami Rukidi III.
Nyina wa Oyo, Umwamikazi Best Kemigisa, yavuze ko urwandiko rw'irage rw'umuhungu we rutubahirijwe. Ariko leta ya Uganda yashyigikiye Kijanangoma. Perezida Yoweri Museveni biteganyijwe ko yitabira ibirori byo kumwimika.
Imihango yo kwimika yatangiye mu rukerera rwo kuri uyu wa kabiri ,Kijanangoma aragenda n'amaguru ibirometero bine yerekeza ku ngoro y'ibwami ya Karuziika, aho aza guhabwa umugisha n'abagize umuryango w'ibwami, akicazwa ku ntebe y'ubwami, ndetse akambikwa imyambaro y'ibwami.
