Victor Kingombe umuganga ukiri muto wakoreraga mu ntara imwe mu ziherutse kwibasirwa na Ebola muri Repubulika Iharanira Demokarasi ya Congo, yapfuye kuri uyu wa Kane azize icyo cyorezo mu kigo kivurirwamo abarwaye Ebola giherereye mu mujyi wa Kisangani.
Nyuma yo gutangazwa kw'urupfu rwe, abo bakoranaga ndetse n'abagize umuryango we bateraniye mu muhango wo kumushyingura, barebera kure uko abakozi b'ubuzima bambaye imyambaro ibarinda ubwandu batwaraga umurambo we bawushyira mu isanduku.
Muganga Agnes Kalokola, wakoranaga na we, yagize ati: “Muganga wacu w'inzobere mu buvuzi bw'indwara z'imbere mu mubiri aragiye. Muganga Victor, kuki? Kuki, Muganga? Muganga wacu w'inzobere mu buvuzi bw'indwara z'imbere mu mubiri.”
Kisangani, umurwa mukuru w'intara ya Tshopo, watangaje bwa mbere ko habonetse abanduye Ebola mu mpera za Kamena.
Ikigo kivurirwamo Ebola cyapfiriyemo Kingombe cyafunguwe mu buryo bwemewe n'amategeko hashize ibyumweru bibiri gusa,
Nubwo muri uku kwezi umubare w'abandura Ebola wagabanutse mu ntara ya Ituri, ari na yo yabereyemo intangiriro y'iki cyorezo, intara zituranye na yo zakomeje kubona ubwiyongere bukabije bw'abandura.
Mu Ntara ya Kivu y'Amajyaruguru, umubare w'abanduye wazamutseho 73% mu byumweru bitatu bishize.
Ebola ikomeje gukwirakwira mu bihe bigoye cyane, bitewe n'umutekano muke, kwimurwa kw'abaturage, imyigaragambyo y'abakozi b'ubuzima, ndetse n'urujya n'uruza rwinshi rw'abantu.
Ishami ry'Umuryango w'Abibumbye ryita ku Buzima (OMS/WHO) ryatangaje ko iki cyorezo kiri mu nzira yo kurenga icyorezo cya Ebola cyibasiye Afurika y'Iburengerazuba hagati ya 2014 na 2016, ari na cyo cyahitanye abantu benshi kurusha ibindi byose byanditswe mu mateka.
Abakozi b'ubuzima kandi bakomeje guhura n'ikibazo gikomeye cyo kutizerwa n'abaturage, aho ibigo bivurirwamo Ebola n'amatsinda ashinzwe gushyingura abishwe n'icyorezo byagiye bigabwaho ibitero inshuro nyinshi.
Ibihuha na byo byakwirakwiriye cyane, ku buryo abantu benshi batarizera ko Ebola ari indwara ibaho koko muri iki gihugu cya congo.
