Perezida w’Amerika Donald Trump na Perezida w’Ubushinwa Xi Jinping babwiranye amagambo meza ubwo basangiraga ifunguro rihebuje rya nijoro ryo ku rwego rwa leta mu biro bya White House ariko nta kimenyetso bagaragaje cy’intambwe yatewe ku bibazo byihutirwa.
Xi yashimangiye ko ubwenge buhangano (AI) bukwiye gukomeza “kugenzurwa n’abantu” ndetse ibihugu byombi bigakora “nk’ibihugu bikomeye bishyira mu gaciro”, mu gihe Trump yashimagije ejo hazaza harangwa n'"ubwumvikane, amahoro no kugera ku ntego" ku bihugu byombi.
Ariko haracyari ubushyamirane nubwo habayeho iyo mvugo iryohereye yo muri dipolomasi, harimo ku ngingo irebana na Taiwan – mbere yaho ku wa kane, Xi yashishikarije Trump kujya mu “mwanya nyawo” ku bijyanye n'icyo kirwa cyitegeka Ubushinwa bufata nk’icyabwo, mu gihe hari intwaro nyinshi zigenewe icyo kirwa Trump yabaye aretse kugiha.
Ubwo yavugaga ijambo mu ijoro ryo ku wa kane, Trump yashimiye Xi kuba yakoze urugendo rurerure rwo kujya muri Amerika, anavuga ko umubano hagati yabo ukomeye.
Trump yagize ati: “Nta rimwe twigeze tubana neza cyane kurusha ubu.”
Yashimagije amateka y’igihe kirekire y’umubano w’Amerika n’Ubushinwa.
Cyo kimwe n’aya Trump, amagambo ya Xi na yo yari arimo gushimagiza kwinshi, yibanda ku mubano ushingiye ku muco no gusangira amateka hagati y’Amerika n’Ubushinwa.
