Umuhanzi w’Umunyamerika ukora umuziki wa R&B, Ne-Yo, ateganyijwe kuririmba i Nairobi kuri Ulinzi Sports Complex ku wa Kabiri, tariki ya 20 Ukwakira 2026, mu gitaramo cyiswe “One Night Only: Brunch Edition.”
Iki gitaramo kizaba ku munsi mukuru w’igihugu cya Kenya uzwi nka Mashujaa Day, ndetse kikaba ari ubwa mbere Ne-Yo azaba agarutse muri Kenya nyuma y’imyaka 11 adahagera.
Abakunzi be bagaragaje ubushake bukomeye bwo kuzitabira iki gitaramo kuva amatike yatangiraga kugurishwa ku wa Gatandatu, tariki ya 12 Nzeri 2026. Amatike ya Early Bird Gold, yagurishwaga amafaranga ya Kenya Ksh 7,500, yashize mu gihe kitarenze isaha imwe atangiye kugurishwa.
Nyuma yaho, abategura igitaramo bashyize hanze andi matike yo mu cyiciro cyiswe “New Wave”, ku giciro cya Ksh 10,000, acuruzwa binyuze kuri TicketYetu.
Ne-Yo amaze imyaka irenga 20 mu muziki kandi indirimbo ze zimaze kugira abarenga miliyari 23 bazumvise cyangwa bazicuranga ku mbuga zitandukanye ku isi.
Indirimbo “So Sick” yamugize icyamamare:
Indirimbo “So Sick”, yasohotse mu mwaka wa 2005, ni imwe mu ndirimbo zamamaje cyane Ne-Yo. Yageze ku mwanya wa mbere ku rutonde rwa Billboard Hot 100 muri Amerika.
Iyi ndirimbo kandi yageze ku mwanya wa mbere ku rwego mpuzamahanga ndetse kuri Spotify imaze kugira streams zirenga miliyari 1.26.
“Miss Independent”
Indirimbo “Miss Independent”, yasohotse mu 2008, yageze ku mwanya wa 7 kuri Billboard Hot 100, ndetse Ne-Yo ayiherewemo igihembo cya Grammy Award.
Muri 2026, iyi ndirimbo yinjiye ku mugaragaro mu ndirimbo zageze kuri miliyari imwe ya Spotify streams.
“Because Of You”
Indirimbo “Because Of You” yo mu 2007 yageze ku mwanya wa 2 kuri Billboard Hot 100, naho mu Bwongereza igera ku mwanya wa 4.
Iyi ndirimbo yahawe icyemezo cya Platinum, kandi kuri Spotify imaze kugira abarenga 770 miliyoni bayicuranga.
“Closer”
Mu 2008, Ne-Yo yashyize hanze “Closer”, indirimbo yaje ku mwanya wa mbere ku rutonde rw’indirimbo zakunzwe cyane mu Bwongereza, naho muri Amerika igera ku mwanya wa 7.
Kuri Spotify, iyi ndirimbo imaze kugira abarenga 486 miliyoni bayicuranga.
Indirimbo yakoranye n’abandi bahanzi zakunzwe cyane:
Ne-Yo afite kandi indirimbo nyinshi yakoranye n’abandi bahanzi bakomeye mu muziki wa Pop na Dance.
Muri 2011, yakoranye na Pitbull, Afrojack na Nayer mu ndirimbo “Give Me Everything.” Iyi ndirimbo yageze ku mwanya wa mbere kuri Billboard Hot 100.
Muri uwo mwaka wa 2011, “Give Me Everything” yabaye imwe mu ndirimbo zagurishijwe cyane ku isi binyuze mu buryo bwa digital, iza ku mwanya wa 7, aho yagurishijwe kopi zigera kuri miliyoni 8.2.
Kuri Spotify, iyi ndirimbo imaze kugira streams zirenga miliyari 2.28.
Iki gitaramo cya “One Night Only: Brunch Edition” kizaba ari amahirwe ku bakunzi ba Ne-Yo muri Kenya kongera kumubona ku rubyiniro nyuma y’imyaka 11 atarataramira muri icyo gihugu.
