Sam Altman, umuyobozi mukuru wa kompanyi OpenAI y’ubwenge buhangano (AI), atekereza ko abantu bakwiye kurushaho kugirira icyizere kompanyi ye n’izindi zimeze nka yo ko zizakora igikwiye ku bijyanye n’ikorwa rya AI, mu gihe abantu barimo kurushaho guhangayikishwa n’ibyago byose AI ishobora guteza.
Ku wa kabiri, mu nama i San Francisco muri Amerika, Altman yagize ati: “Isi ikwiye kwizera ko tugiye gukora igikwiye kuko ni cyo kintu gikwiye kandi twiyumvisha uburemere bw’ibi.”
Ariko Altman yavuze ko abantu bafite impamvu yo kugira ubwoba ku bijyanye na AI, kubera ko ubushobozi bw’ibikoresho byayo bwateye intambwe mu buryo bwihuse.
Yagize ati: “Ntabwo bisaba gutekereza cyane nkuko byahoze kugira ngo [twebwe] dutekereze ukuntu ibintu bishobora kugenda nabi.”
“Ntekereza ko isi ifite impamvu yo kugira ubwoba.”
Altman yabivugiye mu nama ngarukamwaka itegurwa na kompanyi Salesforce y’ikoranabuhanga.
Ni bwo bwa mbere yari avuze ku mugaragaro kuva ubwo mu cyumweru gishize ubutumwa bwo ku mbuga nkoranyambaga bwabaga kimomo, butangajwe na Jacob Coxon, umushakashatsi waretse akazi muri kompanyi Anthropic ya AI.
