Grand Mopao ari kwitegura gushyira hanze, ku itariki ya 26 Ugushyingo , alubumu ye nshya yise “La Vie en Rose”, igihangano cy’ubuhanzi cyibanda ku mateka n’umurage wa Quartier Latin International.
Muri uyu mushinga, icyamamare cya rumba , Koffi Olomide, azahuriza hamwe abahanzi batandukanye banyuze mu itsinda rye, mu rwego rwo kongera gusubira mu bihe bikomeye by’amateka yaryo.
Iyi alubumu izaba ari uburyo bwo guha icyubahiro ibisekuru bitandukanye by’abacuranzi bagize uruhare mu kumenyekanisha iri tsinda ry’umuziki ryashinzwe mu 1986. Uretse gusubiramo indirimbo zakunzwe zaranzwe n’amateka y’itsinda, Koffi Olomide azanaha umwanya wihariye umugore we, Cindy Le Cœur, amutura indirimbo yise “Cindy d’Or”.
Iyi ndirimbo, umuhanzi ayivuga nk’imwe mu zizaba zikomeye kuri iyi alubumu, izaba mu by’ingenzi bizayiranga. “La Vie en Rose” izaba irimo kandi indirimbo zaririmbwe n’abagize Quartier Latin muri iki gihe ndetse n’abahoze muri iri tsinda.
Binyuze muri uyu mushinga, Quadra Koraman arashaka kwizihiza imyaka 40 y’amateka, guhanga no guhererekanya umuco w’umuziki. Iyi alubumu izasohoka izaba iri mu mwaka wihariye ku itsinda, kuko ari wo ryizihizamo imyaka 40 rimaze rishinzwe.
Binyuze kuri “La Vie en Rose”, Vieux Rambo azongera kwerekana amateka y’itsinda ryagize uruhare rukomeye kandi rurambye mu iterambere rya rumba .
