Umuhanzi w’Umunya-Uganda Pius Mayanja, uzwi cyane ku izina rya Pallaso, yatangaje gahunda afite yo kubaka amashuri agamije gufasha abana batishoboye ndetse n’imfubyi kubona uburezi bufite ireme.

Pallaso yavuze ko iyi gahunda ari imwe mu nzira yahisemo gukoresha mu gufasha abana bafite intege nke mu buzima, cyane cyane ababuze ubushobozi bwo kubona uburezi bwiza kubera ibibazo by’amikoro.

Mu kiganiro yagiranye na televiziyo yo muri Uganda, uyu muhanzi yavuze ko uyu mushinga wo kubaka amashuri uri gukorwa binyuze muri fondasiyo, ukaba ushyigikiwe n’inshuti ze zo muri Uganda ndetse no mu mahanga basangiye icyerekezo cyo gufasha abana.

Yagize ati: “Ndashaka guha imbaraga abana batishoboye n’imfubyi kugira ngo babone uburezi bwiza. Umushinga wo kubaka amashuri uri gukorwa binyuze muri fondasiyo, kandi hamwe n’inshuti zanjye turateganya kubaka amashuri menshi.”

Pallaso kandi yavuze ko uyu mushinga udashaka gufasha abana bake gusa, ahubwo ko bafite gahunda yo kubaka amashuri menshi, kugira ngo abana benshi batishoboye babashe kuyigiramo no kubona amahirwe yo kwiga.

Iyi gahunda yiyongera ku bikorwa Pallaso amaze igihe akora byo gukoresha izina rye, ubushobozi n’umutungo afite mu gufasha abantu batishoboye no guteza imbere imibereho y’abana bafite ibibazo by’ubuzima n’amikoro.