APR FC ihagarariye u Rwanda mu mikino ya CAF Champions League yatsindiwe na Aigles du Congo 1-0 mu mukino ubanza wabereye mu mujyi wa Lubumbashi muri Repubulika Iharanira Demokarasi ya Kongo kuri iki cyumweru, tariki ya 6 Nzeri, 2026 kuri Stade Kibasa Maliba y’i Lubumbashi. 

Igitego cya Aigles du Congo cyatsinzwe na Zemanga Soze wacyinjije ku munota wa 44 w’umukino maze amakipe ajya kuruhuka ari 1-0. 

Ni umukino utoroheye APR FC kuko uretse abakinnyi bayo barimo kapiteni wayo Djibril Ouattara n'abandi bahawe ikarita y'umuhondo, umunya Uganda uyikinira mu kibuga hagati, Ronald yeretswe ikarita itukura nyuma y'umukino.

Umukino wo kwishyura uzahuza aya makipe yombi ku wa Gatanu, tariki ya 11 Nzeri 2026 kuri Stade Amahoro. 

APR FC yatsindiwe muri RDC, mu gihe mukeba wayo Rayon Sports ihagarariye u Rwanda mu mikino ya CAF Confederation Cup yanganije na Panthére du Ndé yo muri Cameroun igitego 1-1 mu mukino wabaye ku wa Gatanu tariki 4 Nzeri 2026. 

Igitego cya Rayon Sports cyo mu mukino ubanza cyatsinzwe na Junior Kameni ukomoka muri Cameroun. Umukino wo kwishyura uzahuza Rayon Sports na Panthére du Ndé ku wa Gatandatu, tariki ya 12 Nzeri, 2026.