Umutekano wakajijwe muri Masisi na Walikale, muri Kivu y’Amajyaruguru, mu gihe imirwano hagati y’inyeshyamba za AFC/M23, FARDC ndetse na Wazalendo ikomeje gukaza umurego.

Muri Masisi, inyeshyamba za AFC/M23 zikomeje gushyira igitutu gikomeye ku mpande zitandukanye z’urugamba, cyane cyane ku muhanda uhuza ya Gurupema Nyamaboko 1er na Gurupema    za Waloa Yungu na Waloa Uroba, zombi ziri mu karere gaturanye ka Walikale.

Kuva ku wa Gatandatu, abarwanyi ba AFC/M23 bafashe agace ka Ngululu, mbere yo kwigarurira ikigo cy’ubucuruzi cya Humura ku Cyumweru. 

Uko gufata utuduce twose byahaye amahirwe inyeshyamba za AFC/M23 kwegera hafi ya Walikale zinyuze kuri uyu muhanda, uri mu gice gafite akamaro gakomeye gahuza amajyepfo ya Masisi n’uduce dutandukanye twa Walikale.

Mu majyepfo ho, muri gurupema ya Ufamandu 1er, AFC/M23 niyo iri kugenzura uduce twa Miko, Kaleta na Remeka, iri muri localité ya Katuunda. 

Ibi bice biherereye ku ntera y’ibilometero hafi 15 uvuye i Biriko, hafatwa nk’umwe mu midugudu ibanza ya gurupema ya Waloa Loanda, mu majyepfo ashyira uburasirazuba bwa wa Walikale.

Mu burasirazuba bwa Walikale-centre na ho, ibintu bikomeje guhindura isura . Muri  gurupema ya Luberike, amakuru aturuka mu baturage bo muri ako gace avuga ko inyeshyamba za AFC/M23 zakomeje kongererwa abarwanyi n’amasasu i Kashebere na Kibati.

Nk’uko ayo makuru akomeza abivuga, AFC/M23 yaba ishaka gutangiza igitero ku birindiro bigenzurwa na FARDC n’aba Wazalendo ku muhanda wa Mungazi-Kibua, hagamijwe gukomeza gutera imbere yerekeza muri Walikale-centre.