Kuri uyu wa mbere Kenya iratangira igikorwa cyo guhashya abanyamahanga bafite amaduka mato banakora ibikorwa byo gucuruza ibicuruzwa badafite ibyangombwa byemewe n'amategeko, nyuma y'uko Perezida William Ruto yategetse abayobozi guhagarika ubucuruzi nk'ubwo.

Yavuze ko abanyamahanga badakwiye guhangana n'Abanyakenya mu bucuruzi nko gucuruza ibicuruzwa bito n'ubucuruzi buto, mu gihe ishoramari ry'abanyamahanga ryemewe mu bikorwa bisaba igishoro kinini n'ishoramari.

Iri tangazo ryateje ubwoba n'ihungabana mu banyamahanga bakora ubucuruzi buto muri Kenya barimo Abarundi.

Aganira n'abacuruzi b'ibigo bito n'ibiciriritse ku wa kabiri tariki 2 z'ukwezi kwa Munani , Perezida William Ruto yavuze ko hari impungenge ko hari abanyamahanga bashinze ubucuruzi bugurisha ibicuruzwa, bagahangana n'abacuruzi bato.

Ruto yagize ati: "Dufite Umushinga w'Inteko Ishinga Amategeko ko hari ibikorwa by'ubucuruzi abanyamahanga badashobora gukora muri Kenya. 

Ndashaka ko mwicarana n'abacuruzi murebe igituma iri tegeko ritaratorwa ryemezwe ku buryo dufunga ibyuho byose kugira ngo umuntu ntazave mu Bushinwa kuza gukora ubucuruzi azunguza mu mihanda". Imboni zacu ziri muri kenya zaduhamirije ko hashobora kuba imyigaragambyo ikomeye muri iki gihugu .